त्रैमासिकमा बक्सअफिस : १९ करोडमाथि व्यापार, ४ वटाले करोड कटाउँदा १० वटा लाखमै सीमित

काठमाडौं । २०८३ वैशाखदेखि असारसम्मको तीन महिनालाई फर्केर हेर्दा नेपाली बक्स अफिसमा उराठलाग्दो दृश्य देखिन्छ । यस अवधिमा रिलिज भएका १४ चलचित्रमध्ये एउटा चलचित्रले मात्र लगानी सुरक्षित गर्दै निर्माताको गोजी भर्न सफल भयो । बाँकी १३ वटा चलचित्र व्यावसायिक रूपमा असफल भएका छन् ।

चलचित्र विकास बोर्डको तथ्याङ्क अनुसार यो त्रैमासिकमा प्रदर्शनमा आएका चलचित्रहरूले कुल १९ करोड ३७ लाख १८ हजार ६ सय १० रुपैयाँको व्यापार गरेको देखिन्छ ।

वैशाख, जेठ र असार गरेर यस अवधिमा नेपाली बक्स अफिसमा साताकै दुईवटासम्म चलचित्र रिलिज हुने होडबाजी पनि चले तर, व्यापारिक नतिजा भने उत्साहजनक देखिएन । करोडौंमा बनेका केही चलचित्रको ब्यापार हजारमै अड्किए ।

• 
• 

यो तीन महिनाको अवधिमा व्यापारिक सफलताको स्वाद चाख्ने एक्लो र निर्विकल्प सिनेमा बन्यो-‘लालीबजार’ । वैशाख २५ गते रिलिज भएको यस चलचित्रले ९ करोड ३२ लाख ९ हजार ९२५ रुपैयाँ ग्रस कलेक्सन गर्दै वर्षकै सर्वाधिक सफल चलचित्र बन्यो । अन्य सिनेमाहरू हलमा दर्शक पर्खिरहँदा लालीबजारले भने निर्मातालाई ठूलो मुनाफा दिलाउन सफल भयो ।

नेपाली बजारमा १ करोडको आँकडा पार गर्नुलाई सफलताको एउटा खुड्किलो मानिन्छ । तर, महँगो लगानी र हलसँगको सेयर बाँडफाँडका कारण १ करोड माथि कमाएका तीन चलचित्रले पनि लगानी उठाउन सकेनन् ।

१ बैशाखमा प्रदर्शन भएको तुलसी घिमिरे निर्देशित ‘पहाड’ ६३ लाख ९३ हजार १६२ रुपैयाँमा खुम्चियो ।

वैशाख ११ गते प्रदर्शन भएको ‘परालको आगो’ले ४ करोड २८ लाख कलेक्नस गरेको छ । यसले भने डिजिटल र इन्टरनेसनल राइट्सबाट लगानी सुरक्षितसम्म गरेको हुनसक्छ ।

वैशाख २५ गते लालीबजार, मालती मंगले र गुरुआमा एकसाथ प्रदर्शनमा आए । जसमध्य ‘लालीबजार’ मात्र यस्तो चलचित्र बनेको छ, जसले व्यापारिक सफलताको स्वाद चाखेको छ । यसले आफ्नो लगानी सुरक्षित मात्र गरेन, निर्मातालाई नाफासमेत दिलाएको छ । यो चलचित्रले ९ करोड ३२ लाख ९ हजार ९ सय २५ रूपैयाँभन्दा बढी कमाइ गर्दै वर्षकै सर्वाधिक सफल फिल्म बनेको छ ।

मालती मंगले ५१ लाख ६३ हजार ६ सय ९३ र ‘गुरूआमा’ ले २९ लाख ४२ हजार रुपैयाँ ग्रस कलेक्सन गरे ।

जेठ १ गते ‘एक मुठ्ठी बादल’ र ‘लाइफ ड्यामेज’ प्रदर्शन भए । लाइफ ड्यामेज ३४ लाख ६६ हजार २ सय ९० र एक मुठ्ठी बादल ५ लाख २१ हजार रुपैयाँ ग्रस कलेक्सन गरे ।

‘मितज्यू’ र ‘काजी’ जेठ ८ गते प्रदर्शनमा आए । ‘मितज्यू’ १ करोड ३२ लाख कलेक्सन गरेको छ । ‘काजी’को ४४ लाख ४६ हजार ६० रुपैयाँ मात्रै कमाउन सफल भयो । तर, स्टार कास्ट रहेका यी चलचित्रले पनि लगानी सुरक्षित गर्न सकेनन् ।

जेठ १५ गतेदेखि प्रदर्शनमा आएको ‘रोल नं १’ ले गत शनिबार सफलतापूर्वक ५१ औं दिन पूरा गर्‍यो । यो चलचित्रले गत आइतबारसम्म १ करोड ७८ लाख २३ हजार ९ सय ८ रुपैयाँ ग्रसकलेक्सन गरेको छ । ‘रोल नं १’ करोड क्लबमा प्रवेश गरे पनि हालसम्म लगानी सुरक्षित गर्न सकेको छैन ।

‘रोल नं. १’ ले दर्शकलाई थप आकर्षित गर्ने उद्देश्यले असारको पहिलो सातादेखि टिकटमा ५० प्रतिशत छुटको व्यवस्था गरेको थियो ।

यसैगरी जेठ १५ मै रिलिज भएको अर्को चलचित्र ‘कुम्भ’ ले ४ लाख २५ हजार ८ सय ८५ रूपैयाँ मात्र ग्रस कमाएको छ ।

जितु नेपालको निर्माण तथा अभिनय रहेको चलचित्र ‘आई एम जितबहादुर’ को बक्स अफिस कलेक्सन निकै निराशाजनक गर्‍यो ।  असार ५ गतेबाट प्रदर्शनमा आएको यस चलचित्रले जम्मा ३१ लाख ७ हजार ६९२ रूपैयाँ ग्रस कलेक्सन गरेको छ ।

असार १२ गतेबाट प्रदर्शनमा आएको ‘जाँड’ले १ लाख २६ हजार कलेक्सन गरेको बक्सअफिस रिपोर्ट छ । 

असार २६ गते ‘भागदौड’ यो वर्षकै हालसम्मको सबैभन्दा कम बक्सअफिस कलेक्सन गर्ने चलचित्र बनेको छ ।  ‘भागदौड’ ले ९२ हजार ९९५ रुपैयाँ मात्रै कलेक्सन गरेको छ ।

यो तीन महिनाले नेपाली निर्माता निर्माताहरूलाई गम्भीर पाठ सिकाएको छ । केवल सिनेमा बनाउनु र हलमा लगाउनु मात्र ठूलो कुरा होइन, दर्शकको मन जित्ने कथा र सही रिलिज मिति छनोट नगर्ने हो भने करोडौँको लगानी ‘बालुवामा पानी’ सरह हुने निश्चित छ । आगामी महिनाहरूमा रिलिज हुने सिनेमाले यो घाटा पूर्ति गर्छन् या गर्दैनन्, त्यो भने हेर्न बाँकी नै छ ।

क्र.सं.	चलचित्रको नाम	ग्रस कलेक्सन (रु.)	कैफियत
१	लालीबजार	९,३२,०९,९२५	करोडमा (सर्वाधिक सफल)
२	परालको आगो	४,२८,००,०००	करोडमा
३	रोल नं १	१,७८,२३,९०८	करोडमा
४	मितज्यू	१,३२,००,०००	करोडमा
५	पहाड	६३,९३,१६२	लाखमा
६	मालती मंगले	५१,६३,६९३	लाखमा
७	काजी	४४,४६,०६०	लाखमा
८	लाइफ ड्यामेज	३४,६६,२९०	लाखमा
९	आई एम जितबहादुर	३१,०७,६९२	लाखमा
१०	गुरूआमा	२९,४२,०००	लाखमा
११	एक मुठ्ठी बादल	५,२१,०००	लाखमा
१२	कुम्भ	४,२५,८८५	लाखमा
१३	जाँड	१,२६,०००	लाखमा
१४	भागदौड	९२,९९५	लाख भन्दा कम