बक्सअफिसमा कसको कमाइ कति ?
काठमाडौं । दशैँको उमंग, पारिवारिक जमघट र लामो बिदाको माहोलसँगै नेपाली चलचित्र बजार पनि तातेको छ । चाडपर्वको अवसर पारेर प्रदर्शनमा आएका तीन नेपाली चलचित्र ‘आ बाट आमा २’, ‘छ माया छपक्कै २’ र ‘१२ गाउँ २’ सुरुवाती दिनदबाटै दर्शकको ध्यान तान्न प्रतिस्पर्धामा उत्रिएका छन् । फरक कथावस्तु, कलाकारको आकर्षण र प्रस्तुतिको भिन्नतासहित हलमा आएका यी तीन चलचित्रबीचको बक्सअफिस प्रतिस्पर्धा रोचक बन्दै गएको छ ।
शुक्रबारदेखि प्रदर्शनमा आएका ‘आ बाट आमा २’, ‘१२ गाउँ २’ र शनिबारदेखि हलमा लागेको ‘छ माया छपक्कै २’बीच अहिले बक्सअफिसमा प्रतिस्पर्धा चलिरहेको छ । प्रदर्शनरत तीन चलचित्रमध्ये शो संख्याका आधारमा ‘आ बाट आमा २’ अगाडि देखिएको छ भने कमाइको विवरणले पनि यी सिनेमाप्रति दर्शकको चासो कस्तो छ भन्ने संकेत गरेको छ ।
निर्माण पक्षबाट प्राप्त जानकारी र उपलब्ध बक्स अफिस विवरणअनुसार ‘आ बाट आमा २’ले ३ करोड १५ लाख रुपैयाँ ग्रस कमाइ गरेको छ । त्यस्तै, ‘छ माया छपक्कै २’ले २ करोड ४५ लाख रुपैयाँ ग्रस कमाएको छ । एक्सनप्रधान चलचित्र ‘१२ गाउँ २’को ग्रस कमाइ भने १ करोड ७५ लाख रुपैयाँ पुगेको बुझिएको छ ।
कमाइका यी आँकडाले तीनवटै चलचित्रबीच प्रतिस्पर्धा रोचक बनेको देखाउँछन् । यद्यपि, प्रदर्शन अवधि र शो संख्यामा भिन्नता रहेकाले कुल कमाइलाई मात्र आधार बनाएर चलचित्रको लोकप्रियता तुलना गर्न भने मिल्दैन ।
चन्द्र पन्तको निर्देशनमा बनेको ‘आ बाट आमा २’ले आमाको माया र सन्तानबीचको गहिरो भावनात्मक सम्बन्धलाई केन्द्रमा राखेको छ । पारिवारिक प्रेम, सम्बन्धको मिठास र आमा–सन्तानबीचको आत्मीयतालाई मुख्य विषय बनाइएको यस चलचित्रले दर्शकको भावनालाई छुने लक्ष्य राखेको देखिन्छ।
चलचित्रको कमाइ ३ करोड १५ लाख रुपैयाँ ग्रस पुगेको विवरण सार्वजनिक भएको छ। निर्माण लागत १ करोड ८० लाख रुपैयाँ रहेको बताइएको यस फिल्मको ग्रस कमाइ उक्त लागतभन्दा बढी देखिएको छ । तर ग्रस कमाइ र निर्माताले प्राप्त गर्ने वास्तविक आम्दानी फरक हुने भएकाले यसलाई सोझै नाफाका रूपमा बुझ्न मिल्दैन ।
विपना थापा, पल शाह, मलिका महत, रिश्ता गुरुङ, निकिता आचार्य, आकाश श्रेष्ठ, सबिन श्रेष्ठ, प्रदीप रावत, साइग्रेस पोखरेल, गजित विष्ट, नरेन खड्का र दिलिप अखेडालगायत कलाकारको अभिनय रहेको चलचित्रले पारिवारिक कथामार्फत दर्शकको मन जित्ने प्रयास गरेको छ ।
दीपेन्द्र लामाको निर्देशनमा बनेको ‘छ माया छपक्कै २’ पारिवारिक सम्बन्ध, प्रेम, विश्वास, आशा र धोकाजस्ता विषयलाई समेटेको छ । यस चलचित्रले दर्शकलाई भावनात्मक कथावस्तुसँग जोड्ने प्रयास गरेको छ ।
चलचित्रमा दीपकराज गिरी, केकी अधिकारी र शनिसा भट्टराई मुख्य भूमिकामा छन् । रोहित अधिकारी निर्माता रहेको फिल्ममा दीपकराज गिरी पठाओ चालकको भूमिकामा प्रस्तुत भएका छन् । उनको यो भूमिकाले चलचित्रको कथालाई कुन दिशामा अघि बढाउँछ भन्ने पक्ष दर्शकका लागि चासोको विषय बनेको छ ।
चलचित्रले प्रेम र सम्बन्धको मिठाससँगै अविश्वास, छटपटी, छलकपट र धोकाले मानवीय सम्बन्धमा पार्ने प्रभावलाई पनि कथाको हिस्सा बनाएको छ । विश्वास र आशाबीच अघि बढ्ने सम्बन्धले कस्तो मोड लिन्छ भन्ने कौतूहलताले फिल्मको कथावस्तुलाई थप रोचक बनाउने अपेक्षा गर्न सकिन्छ ।
चलचित्रमा मेक्सम गौडेल, रमा थपलिया, रवीन्द्र झा, दीपाश्री निरौला, निर्मल शर्मा, प्रकाश घिमिरे र कर्मालगायत कलाकारको पनि अभिनय रहेको छ ।
विराज भट्टको निर्देशनमा बनेको ‘१२ गाउँ २’ एक्सनप्रधान चलचित्र हो । एक्सन दृश्यसँगै पारिवारिक सम्बन्ध, संघर्ष र प्रतिशोधको कथालाई जोडेर निर्माण गरिएको फिल्ममा विराज भट्ट र समीर भट्ट मुख्य आकर्षणका रूपमा रहेका छन् ।
चलचित्रले १ करोड ७५ लाख रुपैयाँ ग्रस कमाइ गरेको बुझिएको छ । बुबा–छोराको पर्दा उपस्थितिले पनि फिल्मप्रति दर्शकको चासो बढाएको छ । एक्सन रुचाउने दर्शकका लागि लक्षित यस चलचित्रले पारिवारिक सम्बन्ध र प्रतिशोधको कथालाई कसरी प्रस्तुत गर्छ भन्ने पक्ष यसको महत्त्वपूर्ण आकर्षण हो ।
चलचित्रमा विराज भट्ट, समीर भट्ट, अनुपविक्रम शाही, प्रकाश शाह, सुनील पोखरेल, कालु राना, कृशु शाही (काफिया), वर्षा इटनी, खुसी कार्की र पुष्कर भट्टलगायत कलाकारको अभिनय रहेको छ । यसै चलचित्रबाट कृशु शाही (काफिया) र वर्षा इटनीले नेपाली चलचित्र क्षेत्रमा पदार्पण गरेका छन् ।
दशैँको समयमा प्रदर्शनमा आएका यी तीन चलचित्रले नेपाली दर्शकलाई फरक–फरक स्वाद दिएका छन् । ‘छ माया छपक्कै २’ले प्रेम, विश्वास र सम्बन्धका आरोह–अवरोहलाई प्रस्तुत गरेको छ । ‘आ बाट आमा २’ले आमा र सन्तानबीचको भावनात्मक सम्बन्धलाई पर्दामा उतारेको छ भने ‘१२ गाउँ २’ले एक्सन, संघर्ष र प्रतिशोधलाई प्राथमिकता दिएको छ ।
प्रदर्शनरत तीन चलचित्रमध्ये शो संख्या र कमाइका आधारमा ‘आ बाट आमा २’को तुलनात्मक रूपमा बढी छ । अर्कोतर्फ, ‘१२ गाउँ २’ले एक्सन र बुबा–छोराको जोडीमार्फत आफ्नो छुट्टै दर्शक वर्गलाई आकर्षित गर्ने प्रयास गरेको छ ।
अबको प्रतिस्पर्धामा कुन चलचित्रले दर्शकको साथ कति समयसम्म कायम राख्छ, शो संख्या बढ्छ वा घट्छ र बक्स अफिसको समीकरण कसरी बदलिन्छ भन्ने विषय महत्त्वपूर्ण हुनेछ । दशैँको बाँकी अवधिमा दर्शकको प्रतिक्रिया र प्रदर्शनको निरन्तरताले यी तीन चलचित्रको व्यावसायिक यात्राबारे थप स्पष्ट चित्र प्रस्तुत गर्नेछ ।
