राजेशले ३६ वर्षअगाडिको पहिलो चलचित्रको पारिश्रमिक नै पाएका छैनन् !
काठमाडौं । महानायक राजेश हमालले तीन दशकभन्दा लामो समयमा करिब तीन सयभन्दा धेरै चलचित्रमा काम गरेका छन् । उनले आफू सिनेमामा आएपछि नेपाली चलचित्र क्षेत्र व्यवसायिक भएको बताउने गरेका छन् ।
आफूले लगातार कमर्सियल चलचित्रमा काम गर्दा चलचित्र क्षेत्रले धेरै रोजगारी सिर्जना गरेको बताएका छन् । राजेशले कुन चलचित्र मौलिक र कुन कमर्सियलभन्दा पनि आफूले जतिसक्दो धेरै चलचित्रमा काम गर्नुपर्छ भन्ने उद्देश्यले चलचित्रमा काम गरेको बताएका छन् ।
उनले कति पारिश्रमिक लिन्थेँ भन्नेबारे प्रष्टसँग खुलाएका छैनन् । तर, पारिश्रमिकभन्दा पनि आफूले चलचित्र जतिसक्दो धेरै बन्नुपर्छ भन्नेमा जोड दिएका छन् ।
आफ्नो पुस्तक युगदेखि युगसम्ममा उनले आफूले लिएको पहिलो चलचित्रको पारिश्रमिक भने खुलाएका छन् । उनले आफूले सन् १९८९ पहिलो चलचित्र युगदेखि युगसम्ममा अभिनय गरेको २० हजार रुपैयाँ पारिश्रमिक लिएको बताएका छन् ।
२० हजार रुपैयाँ पारिश्रमिक दिने सहमति भए पनि हालसम्म सबै पारिश्रमिक नपाएको बताएका छन् । २० हजार रुपैयाँमा १५ हजार रुपैयाँ मात्रै पाएको उनले पुस्तकमा उल्लेख गरेका छन् । पाँच हजार रुपैयाँ अझै नपाएको राजेशले बताएका छन् ।
आफूले पनि नमागेको र निर्माताले पनि पाँच हजार रुपैयाँ नदिएको राजेशले बताएका छन् ।
युगदेखि युगसम्मलाई दीपक रायमाझीले निर्देशन गरेका थिए । छविराज ओझा र कुवेर शर्माले निर्माण गरेका थिए । राजेश हमाल र कृष्टि मैनाली मुख्य भूमिकामा रहेको चलचित्रले निकै राम्रो व्यापार गरेको थियो ।
