फ्राइडे रिलिज अन्तर्गत ‘मोहर’ र ‘सिटामोल’ हलमा
काठमाडौं । चलचित्र ‘मोहर’ र ‘सिटामोल’ आजबाट रिलिज भएका छन् । फ्राइडे रिलिजअन्तर्गत यी दुई नेपाली चलचित्र आजबाट रिलिज भएका हुन् ।
दुवैले सन्तोषजनक शो पाएका छन् । दर्शकको वर्ड अफ माउथ कस्तो रहन्छन, त्यसमा यी चलचित्रको व्यापार निर्धारण हुनेछ ।
ओम प्रतिकको लेखन तथा निर्देशनमा निर्माण भएको सिनेमा ‘मोहर’मा चुम्बन जंग शाहीको लगानी छ ।
चलचित्र ‘मोहर’मा पल शाह, नीति शाह, बेनिशा हमाल, अर्जुन जंग शाही, लक्ष्मी गिरी, सारा शर्मालगायत कलाकारहरुको अभिनय छ । सिनेमा ‘मोहर’को गीतसंगीत र ट्रेलरले दर्शकको राम्रो साथ पाइसकेका कारण पनि बक्सअफिसमा सुखद ओपनिङ गर्ने निर्माणपक्षको अपेक्षा छ ।
‘सिटामोल’लाई राजबहादुर सानेले निर्देशन गरेका छन् । टिजर र ट्रेलरले राम्रो प्रतिक्रया पाएकाले दर्शकले सिनेमा पनि मन पराउनेमा निर्माण टिम ढुक्क देखिएको छ ।
चलचित्रमा सौगात मल्ल, बेनिशा हमाल, श्री कृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण नेपाली, आराध्या राज्यलक्ष्मी डिसीको अभिनय छ । श्री कृष्ण र जानुकाले यही सिनेमाबाट नेपाली रजतपटमा डेव्यु गरेका हुन् ।
तुल्सी देवी फिल्म प्रालीले जुनतारा फिल्मसुको सहकार्यमा निर्माण भएको सिनेमाको कथा प्रदीप भारद्धाज र निर्देशक सानेले लेखेका हुन् । सिमोस सुनुवारको प्रस्तुती रहेको सिनेमामा भुगोल कुमार कार्की र विकाश राज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता अनि गंगाराम श्रेष्ठ सह–निर्मातामा छन् ।