अल्लु अर्जुन विश्वभर तहल्का मच्चाउने तयारीमा, यी हुन् अब आउने ठूला चलचित्र
काठमाडौं । दक्षिण भारतीय सुपरस्टार अल्लु अर्जुनको क्रेज यतिबेला केवल भारतमा मात्र होइन विश्वभर चुलिएको छ । ‘पुष्पा २: द रुल’ को अभूतपूर्व सफलता र बक्स अफिसमा राखेको ऐतिहासिक रेकर्डपछि अर्जुन अब ग्लोबल सुपरस्टारको रूपमा स्थापित भएका छन् ।
यसैबीच अल्लु अर्जुनले आगामी केही वर्षका लागि भारतीय सिनेमाकै सबैभन्दा ठूला र चर्चित निर्देशकहरूसँग मिलेर गर्न लागेका ५ वटा मेगा प्रोजेक्टहरूका साथ दर्शकमाझ आउने तयारीमा छन् ।
कुल ३००० करोड भन्दा बढीको लगानी रहने यी चलचित्रहरूले भारतीय सिनेमाको स्तरलाई हलिउडको स्तरमा पुर्याउने अनुमान गरिएको छ ।
यी ५ वटा मेगा प्रोजेक्टहरूको लाइनअप हेर्दा अल्लु अर्जुन आगामी ५ वर्षसम्म बक्स अफिसमा एकछत्र राज गर्ने तयारीमा छन् ।
अल्लु अर्जुनका ५ ठूला आगामी चलचित्र
एट्लीसँगको बहुप्रतिक्षित सहकार्य ‘एए२२-ए६’
‘जवान’ जस्तो ब्लकबस्टर फिल्म दिएका निर्देशक एट्ली र अल्लु अर्जुन पहिलोपटक एउटै पर्दामा देखिँदैछन् । ६०० देखि ८०० करोडको विशाल बजेटमा बन्ने यो चलचित्र एक ‘साइन्स-फिक्सन एक्शन थ्रिलर’ हुने बताइएको छ ।
यो चलचित्रको सबैभन्दा ठूलो आकर्षण अल्लु अर्जुनको ‘डबल रोल’ हुनेछ । यसमा दीपिका पादुकोण, जान्हवी कपूर, रश्मिका मन्दाना र मृणाल ठाकुर जस्ता दिग्गज अभिनेत्रीहरू रहनेछन् भने विजय सेतुपति विशेष भूमिकामा देखिनेछन् । यो चलचित्र २०२७ को सुरुतिर रिलिज हुने सम्भावना रहेको छ ।
लोकेश कनागराजको ‘लोकेश सिनेमेटिक युनिभर्स’ (AA23)
‘कैथी’, ‘विक्रम’ र ‘लियो’ जस्ता फिल्ममार्फत आफ्नै एउटा सिनेमेटिक युनिभर्स बनाएका निर्देशक लोकेश कनागराजसँग अर्जुनले सहकार्य गर्दैछन् । यो एक ‘डार्क एक्शन थ्रिलर’ हुनेछ । चर्चा यो छ कि यो फिल्म पनि LCU (लोकेश सिनेमेटिक युनिभर्स) को हिस्सा हुनेछ, जहाँ कमल हसन वा कार्थीको क्यामियो देख्न पाइनेछ । यसको छायांकन २०२७ बाट सुरु हुने तयारी छ ।
१ हजार करोडको पौराणिक महाकाव्य (त्रिविक्रम श्रीनिवाससँग)
निर्देशक त्रिविक्रम श्रीनिवास र अल्लु अर्जुनको हिट जोडी यसपटक केही फरक र विशाल सोचका साथ आउँदैछ । भारतीय सिनेमाकै महँगो फिल्ममध्ये एक मानिने यो प्रोजेक्ट एक ‘पौराणिक महाकाव्य’ हुनेछ । १००० करोड भन्दा बढीको बजेटमा बन्ने यस फिल्ममा अर्जुनले भगवान कार्तिकेयको भूमिका निभाउने चर्चा छ । यो प्रोजेक्ट २०२७ फेब्रुअरीबाट फ्लोरमा जाने बताइएको छ ।
सन्दीप रेड्डी वांगाको ‘एन्टी-हिरो’
‘एनिमल’ र ‘कबीर सिंह’ जस्ता फिल्ममार्फत दर्शकलाई तरंगित बनाएका निर्देशक सन्दीप रेड्डी वांगा र अल्लु अर्जुनको सहकार्यले अहिले नै ठूलो चर्चा बटुलिसकेको छ । वांगाको सिग्नेचर स्टाइलमा अर्जुन एक शक्तिशाली ‘एन्टी-हिरो’ को भूमिकामा देखिनेछन् । यो चलचित्र २०२८ मा छायांकन सुरु भई २०२९ सम्ममा दर्शकमाझ आउने अपेक्षा गरिएको छ ।
‘पुष्पा ३: द र्याम्पेज’
पुष्पा राजको आतंक अझै सकिएको छैन । निर्देशक सुकुमारले आधिकारिक रूपमा ‘पुष्पा ३: द र्याम्पेज’ को घोषणा गरिसकेका छन् । तेस्रो भागमा पुष्पा राजको साम्राज्य अन्तर्राष्ट्रिय स्तरमा फैलिएको देखाइनेछ । यसमा रश्मिका मन्दानाका साथै भिलेनको रूपमा विजय देवरकोन्डा देखिन सक्ने बलियो चर्चा छ । यो चलचित्र डिसेम्बर २०२८ सम्ममा विश्वभर प्रदर्शन गर्ने लक्ष्य राखिएको छ ।
