नेपालको पहिलो डिजिटल चलचित्र कुन थियो ?

काठमाडौं । नेपाली चलचित्रमा डिजिटल युगको सुरुवात विसं २०६४ बाट भएको हो । चलचित्र ‘कागबेनी’ प्रदर्शनमा आएसँग डिजिटल युगको सुरुवात भएको थियो ।

नेपाली चलचित्रमा डिजिटल युग भित्र्याउने श्रेय भूषण दाहाललाई जान्छ । भूषणको यो डेब्यू चलचित्र थियो । पहिलो चलचित्रबाटै उनले फिल्म इन्डस्ट्रीमा क्रान्ति गरेका थिए । भूषण टेलिभिजन ब्याकग्राउन्डबााट आएर पहिलो चलचित्र नै डिजिटल निर्देशन गरेका थिए । उनको यो प्रयास र योजना आफैँमा सहासिक थियो । उनको योजनालाई साकार बनाउन निर्माताले पनि त्यतिकै साथ दिएका थिए । निर्माताले पनि ठूलो जोखिम मोलेका थिए ।

‘कागबेनी’ विसं २०६४ पुस २७ गते प्रदर्शनमा आएको थियो । यो चलचित्रको नाम मुक्तिनाथबाट दुई घण्टाको पैदल दूरीमा रहेको कालीगण्डकी उपत्यकाको पर्यटकीय स्थल कागबेनीको नामबाट राखिएको थियो ।

• 
• 
• 

‘कागबेनी’ले नेपाली चलचित्रलाई हेर्ने दृष्टिकोणमा परिवर्तन ल्याएको थियो । किनकी सेलुलाइडमा कमजोर रेजुलेसनमा रहेको नेपाली चलचित्रले एकैपटक प्रविधिमा ठूलो फड्को मारेको थियो ।

यो चलचित्र पहिलो सफल तर गैरव्यावसायिक चलचित्र थियो । किन भने त्यो समय डिजिटल सिनेमा बन्छ भन्नेमा धेरैलाई विश्वास नै थिएन ।

नेपालको पहिलो डिजिटल चलचित्र ‘कागबेनी’ क्वेस्ट इन्टरटेनमेन्टले निर्माण गरेको थियो । यो चलचित्रमा सौगात मल्ल, दीया मास्के र निमा रुम्बाको अभिनय रहेको थियो । सौगातको यो पहिलो चलचित्र हो । थिएटरमा काम गरिरहेका उनले पहिलोपटक सिनेमामा काम गरेका थिए ।

यो चलचित्र विभिन्न अन्तर्राष्ट्रिय फिल्म फेस्टिभलमा पनि पुगेको थियो । नेपालमा रिलिज हुनुभन्दा पहिला नै यो चलचित्र भारतको हैदरबाद फिल्म फेस्टिभलमा प्रदर्शन भएको थियो ।

‘कागबेनी’ चीनको सांघाई फिल्म फेस्टिभल र मुम्बई फिल्म फेस्टिभलमा पनि छनोट भएको थियो ।

चलचित्र निर्माताहरूले ठूलो जोखिम उठाउनुका साथै मेहनत पनि त्यति नै धेरै गरेका थिए । अमेरिकी कम्पनी सिलिकन इमेजिङबाट उच्च गुणस्तरमा डिजिटल क्यामेराहरू ल्याएका थिए । यो चलचित्र सिनेमेटोग्राफर बिदुर पाण्डेले खिचेका थिए ।
नेपाली चलचित्र निर्माताले पहिलो पटक डिजिटल क्यामेरा प्रयोग गरेका र स्किल म्यानपावरको अभावमा चलचित्र निर्माणमा केही प्राविधिक समस्या देखिएको थियो ।

यो चलचित्र मुस्ताङ जिल्लाको कागबेनी, जोमसोम, मार्फा र स्याङमा ३० दिन छायांकन गरिएको थियो । ‘कागबेनी’को निर्माणसँगै नेपाली चलचित्र नयाँ युगमा प्रवेश गरेको थियो ।