‘सनी देओलको कुटाइ खाएपछि सुपरस्टार भए शाहरूख खान’
मुम्बई । बलिउड अभिनेता सनी देओल र निर्देशक राजकुमार सन्तोषीको चलचित्र ‘बटवारा १९४७’ (लाहोर १९४७) आगामी अगस्ट १४ मा हलहरूमा प्रदर्शनको तयारीमा छ ।
यो चलचित्र प्रदर्शनको मिति नजिकिँदै गर्दा यसका कलाकारहरूको अभिव्यक्ति सामाजिक सञ्जालमा चर्चाको विषय बनिरहेको छ ।
हालै आयोजित ट्रेलर सार्वजनिक कार्यक्रममा चलचित्रका प्रमुख खलपात्र अभिमन्यु सिंहको एउटा अभिव्यक्ति अहिले चर्चाको विषय बनेको छ । उनले ठट्टा गर्दै बलिउडका शाहरुख खानको सफलताको श्रेय सनी देओलसँगको ‘कुटाइ’ लाई दिएका छन् ।
‘गुलाल’ र ‘रक्त चरित्र’ जस्ता चलचित्रमा आफ्नो सशक्त अभिनय देखाइसकेका अभिमन्यु सिंह ‘बटवारा १९४७’ मा सनी देओलको मुख्य प्रतिष्पर्धी (खलनायक) को भूमिकामा देखिनेछन् । ट्रेलर सार्वजनिक कार्यक्रममा उनले आफू यस चलचित्रमा कसरी छनोट भएँ भन्ने रोचक किस्सा सुनाएका थिए ।
अभिमन्युले भने, “म परिवारसँग स्विट्जरल्याण्डमा बिदा मनाइरहेको थिएँ, त्यतिबेलै निर्देशक राज सरको फोन आयो । उहाँले मलाई तुरुन्त भारत फर्कन भन्नुभयो किनभने मेरो लागि एउटा यस्तो भूमिका थियो, जसमा मैले सनी पाजीको हातबाट नराम्रोसँग कुटाइ खानु पर्ने थियो ।”
उनले अगाडि थपे, “मैले सोचेँ- सन् १९९३ मा सनी पाजीको हातबाट कुटाइ खाएपछि नै शाहरुख खान सुपरस्टार बनेका थिए । सायद उहाँको हातबाट कुटिएपछि मेरो पनि भाग्य चम्किनेछ र म पनि स्टार बन्नेछु । त्यसैले म खुसीसाथ कुटिन तयार भएँ ।”
अभिमन्युको यो भनाइ सन् १९९३ को ब्लकबस्टर चलचित्र ‘डर’ तर्फ लक्षित थियो । यश चोपडाको निर्देशनमा बनेको उक्त चलचित्रमा सनी देओल एक मरिन कमान्डो (नायक) र शाहरुख खान एक ‘स्टकर’ (सनकी प्रेमी/खलनायक) को भूमिकामा थिए ।
चलचित्रको क्लाइमेक्समा सनीले शाहरुखलाई मरणासन्न हुने गरी कुटेका थिए । यद्यपि, सोही नकारात्मक भूमिकाले शाहरुखलाई रातारात सुपरस्टार बनाइदियो ।
‘डर’ चलचित्र व्यावसायिक रूपमा सफल भए पनि यसले सनी देओल र शाहरुख खानको सम्बन्धमा भने लामो समयसम्म दरार ल्याएको थियो । चलचित्रमा नायक (सनी) भन्दा खलनायक (शाहरुख) को भूमिकालाई बढी महिमामण्डन गरिएको भन्दै सनी निर्देशक यश चोपडासँग रुष्ट भएका थिए ।
आफू कमान्डो भएर पनि एउटा सामान्य केटाले सजिलै छुरा प्रहार गरेको दृश्यमा सनीको चित्तबुझाइ थिएन । यही विवादका कारण सनी र शाहरुखबीच करिब १६ वर्षसम्म बोलचाल समेत भएन । यद्यपि, सन् २०२३ मा ‘गदर २’ को ऐतिहासिक सफलतापछि शाहरुखले फोन गरेर बधाई दिएसँगै यी दुई स्टारबीचको तिक्तता समाप्त भएको छ । हालैका दिनहरूमा उनीहरू सार्वजनिक कार्यक्रमहरूमा सँगै देखिने गरेका छन् ।
राजकुमार सन्तोषी र सनी देओलले यसअघि ‘घायल’, ‘घातक’ र ‘दामिनी’ जस्ता सदावहार चलचित्रहरू दिएका छन् । यस चलचित्रमा अभिमन्यु सिंहले लाहोरका एक यस्ता मुस्लिम व्यक्तिको भूमिका निभाएका छन्, जो विभाजनको समयमा हुने दंगाको फाइदा उठाउँदै हिंसामा उत्रिन्छन् ।
अभिमन्यु र सनीबीचको पर्दाको भिडन्त कत्तिको शक्तिशाली हुनेछ, त्यो त अगस्ट १४ मा मात्र थाहा हुनेछ, तर अभिमन्युको ‘शाहरुख खान’ सम्बन्धी टिप्पणीले भने चलचित्रको प्रचारप्रसारमा मद्दत पुर्याएको छ ।
