समीर भट्ट र पल शाह आमनेसामने भएको मैदानमा भोलिपल्टै उत्रिँदै दीपकराज गिरी
काठमाडौं । यसपटकको दशैँ नेपाली फिल्मका लागि निकै रोचक हुने देखिएको छ । पर्दामा कोही एक्सनमार्फत दर्शकको मन जित्ने तयारीमा छन् त कोही पारिवारिक कथा र मनोरञ्जन लिएर आउँदैछन् । अझ रोचक कुरा, दशैँको सुरुवातमै समीर भट्ट र पल शाह आमनेसामने हुनेछन् । उनीहरूको प्रतिस्पर्धाको चर्चा सेलाउन नपाउँदै भोलिपल्टै दीपकराज गिरी र दीपाश्री निरौलाको फिल्म पनि मैदानमा उत्रिनेछ ।
असोज ३० गते दुई प्रतीक्षित फिल्म ‘१२ गाउँ २’ र ‘आबाट आमा २’ एकैसाथ प्रदर्शनमा आउँदैछन् । विराज भट्टको निर्देशन तथा अभिनय रहेको ‘१२ गाउँ २’ मा उनका छोरा समीर भट्ट मुख्य आकर्षणका रूपमा छन् । अर्कोतिर, पल शाह मुख्य भूमिकामा रहेको ‘आबाट आमा २’ ले पनि दर्शकमाझ उत्सुकता बढाएको छ ।
यसरी असोज ३० गतेदेखि नै समीर र पलको फिल्मी भिडन्त सुरु हुनेछ । दुवै कलाकारका आ–आफ्नै दर्शक छन् । समीर एक्सनप्रधान फिल्ममार्फत दर्शकमाझ आफ्नो प्रभाव बढाउने तयारीमा छन् भने पलको फिल्मले भावनात्मक कथामार्फत दर्शकको मन छुने अपेक्षा गरिएको छ । अब दर्शकले कुन फिल्मलाई बढी साथ देलान् भन्ने चासो स्वाभाविक रूपमा बढेको छ ।
तर, दशैँको प्रतिस्पर्धा यतिमै रोकिने छैन । असोज ३१ गते अर्थात् त्यसको भोलिपल्टै दीपकराज गिरी र दीपाश्री निरौलाको ‘छ माया छपक्कै २’ प्रदर्शनमा आउनेछ । नाम चलेका कलाकारहरूको अभिनय रहेको यो फिल्मले पनि दशैँको माहोलमा दर्शक तान्ने लक्ष्य राखेको छ ।
यससँगै दशैँको बक्स अफिस प्रतिस्पर्धा दुई फिल्मबीच मात्र सीमित रहने छैन । लगातार दुई दिनमा तीन फिल्म प्रदर्शनमा आउँदा दर्शकसँग रोजाइका विकल्प थपिनेछन् भने निर्माताका लागि दर्शकको साथ जुटाउनु चुनौतीपूर्ण बन्नेछ ।
दुई वर्षअघि पनि दशैँमा दीपकराज गिरी र विराज भट्टका फिल्म एकै मितिमा प्रदर्शनमा आएका थिए । त्यतिबेला यी दुई कलाकारको फिल्मलाई लिएर निकै चर्चा भएको थियो । अहिले फेरि दशैँमै उनीहरूका फिल्म दर्शकमाझ आउँदैछन् । तर, यसपटक चर्चाको केन्द्रमा विराजभन्दा उनका छोरा समीर भट्ट बढी देखिएका छन् ।
यता, पल शाहले पनि नेपाली फिल्ममा आफ्नो छुट्टै क्रेज बनाएका छन् । ‘आबाट आमा २’ मार्फत दर्शकमाझ आउन लागेका पलसँगै फिल्ममा रहेका अन्य परिचित कलाकारप्रति पनि दर्शकको चासो छ । त्यस्तै, दीपकराज गिरी र दीपाश्री निरौलाको जोडीले ‘छ माया छपक्कै २’ मार्फत कस्तो मनोरञ्जन पस्किनेछ भन्ने प्रतीक्षा पनि उत्तिकै छ ।
तीनै फिल्मका आ–आफ्नै विशेषता छन् । ‘१२ गाउँ २’ को एक्सन, ‘आबाट आमा २’ को भावनात्मक पक्ष र ‘छ माया छपक्कै २’ को मनोरञ्जनले दर्शकलाई फरक–फरक स्वाद दिने अपेक्षा गर्न सकिन्छ ।
दशैँमा दर्शकको पहिलो रोजाइ कुन फिल्म बन्ला ? समीर भट्ट र पल शाहमध्ये कसको फिल्मले बढी दर्शक तान्ला ? अनि एक दिनपछि प्रदर्शनमा आउने ‘छ माया छपक्कै २’ ले प्रतिस्पर्धाको समीकरण कति बदल्ला ?
यी प्रश्नको जवाफ भने फिल्म प्रदर्शनमा आएपछि मात्रै मिल्नेछ । तर, एउटा कुरा निश्चित छ, यसपटकको दशैँ नेपाली फिल्मका लागि प्रतीक्षा, प्रतिस्पर्धा र दर्शकको रोजाइले भरिपूर्ण हुने देखिएको छ ।
