‘जदौ’ मा विनोद न्यौपानेको इन्ट्री
काठमाडौं । चलचित्र ‘जदौ’ कलाकारको लाइनअप बलियो हुँदै गएको छ । निर्माण टिमले हालै अभिनेता विनोद न्यौपानेलाई एक प्रमुख भूमिकामा अनुबन्धन गरेको छ ।
अभिनेता मुकुन भुसालपछि यस चलचित्रमा केही दिनअघि अभिनेत्री नीति शाह र अभिनेत्री ऋचा शर्मा अनुबन्धीत भसकेकी छन् । केही प्रमुख कलाकार अझै बाँकी रहेको बताइएको छ ।
विविध भूमिकामा प्रभावशाली अभिनय गर्न सिपालु अभिनेता मानिने विनोद न्यौपानेले ‘जदौ’को हिस्सा बन्न पाएकोमा खुशी व्यक्त गरेका छन् । चलचित्रले दर्शकमाझ नयाँ कथा र प्रस्तुति ल्याउने विश्वास पनि उनले व्यक्त गरेका छन् ।
‘जदौ’ सिल्भर स्क्रिन इन्टरटेन्मेन्ट र समिश्रण मुभिज एण्ड इन्टरटेन्मेन्टले संयुक्त रुपमा निर्माण गर्दैछ ।
अन्तरजातीय प्रेम कथामा आधारित ‘जदौ’मा काजी लिम्बूको निर्माण परिकल्पना छ । लेखन पनि उनकै छ । चलचित्रको निर्देशन कसले गर्नेछ त्यो भने निर्माणपक्षले सस्पेन्स नै राखिएको जनाएको छ ।
तर, काजी लिम्बू नै यसका निर्देशक हुन् । उनको यो डेब्यु सिनेमा हुनेछ ।
यो चलचित्रको सहनिर्मातामा रामराजा सुवेदी, ओम चेम्जोङ र शान्ती तामाङ छन् । श्याम तामाङले खिच्ने यो चलचित्रका गीतमा बाबुल गिरीको संगीत रहनेछ ।
चलचित्र ०८२ सालभित्रै दर्शक माझ ल्याउने योजना रहेको जानकारी सिल्भर स्क्रिनकी प्रबन्धक निर्देशक विकला भन्डारीले दिएकी छिन् ।
