स्वस्थ प्रतिस्पर्धा गर
उत्पादन जति धेरै हुन्छ, त्यति नै प्रतिस्पर्धा बढ्छ । यो बजारको सर्वमान्य नियम हो । यो अकाट्य नियमलाई कसैले चाहेर पनि बदल्न सक्दैन ।
बजारमा चामल होस् वा तरकारी, अथवा गीत होस् वा सिनेमा, जति धेरै उत्पादन हुन्छ त्यति नै प्रतिस्पर्धा पनि बढ्छ । बजारको नियम अनुसार जुन गुणस्तरीय छ, त्यही बिक्छ । जुन राम्रो छ, त्यसैले बजार लिन्छ । राम्रोको माग बढ्छ ।
सिनेमाको हकमा पनि यही नै हो, बजारको नियम नै लागु हुन्छ । त्यसैले राम्रो बनाउनुको विकल्प हुँदैन । जुन चलचित्र राम्रो छ, दर्शकले त्यसैलाई मन पराउँछन्, त्यही नै चल्छ ।
बजारको यो सर्वमान्य सिद्धान्त हो । त्यसैले सिनेमाका निर्देशक, निर्माता र कलाकार आफ्नो चलचित्र कसरी राम्रो बनाउने भनेर सोच्नेतर्फ केन्द्रित हुनुपर्छ । यसको विकल्प छैन ।
तर, नेपालमा चलचित्र रिलिजमा अस्वस्थ प्रतिस्पर्धा बढ्दै गएको छ । वर्षमा ५२ भन्दा धेरै चलचित्र बनेपछि सोलो रिलिजको अवसर कसैले पनि पाउँदैन । त्यसैले कुनै नै कुनै चलचित्रसँग एकै दिन रिलिज हुनैपर्छ । प्रतिस्पर्धा गर्नैपर्छ ।
एकै दिन रिलिजको विकल्प नभएपछि जुन चलचित्रसँगै रिलिज हुने हो त्यो सँग प्रतिस्पर्धा गर्नैपर्छ । अघिल्लो हप्ता रिलिज भएका र पछिल्लो हप्ता रिलिज हुने चलचित्रसँग पनि प्रतिस्पर्धा गर्नुपर्छ । त्यसैले अरुभन्दा राम्रो चलचित्र बनाउनै पर्छ । यदि, तुलनात्मक रूपमा अरुभन्दा कमजोर चलचित्र बने भने त्यो पछि पर्छ नै । यसबाट कसैले चाहेर पनि छेक्न सक्दैन ।
यदि, अरुभन्दा राम्रो चलचित्र बनाउनै पर्नेछ भने अरु कुरा होइन राम्रो चलचित्र कसरी बनाउने भन्नेमा चाहिँ प्रतिस्पर्धा हुनुपर्छ ।
तर, यहाँ अस्वस्थ प्रतिस्पर्धा धेरै हुन्छ । कतिसम्म भने कहिलेकहिलेको इगो साँधेर एकै दिन रिलज डेट तोक्ने, प्रचार सामग्री पोस्टर, टिजर, ट्रेलर र गीत पनि एकै दिन रिलिज गर्ने प्रवृत्ति हाबी भएको छ ।
यसै पनि दुईवटा चलचित्र एकै दिन रिलिज हुँदा निर्माता व्यापारिक मारमा पर्छन् । त्यसमा पनि हुने अस्वस्थ प्रतिस्पर्धाले व्यापारलाई थप कमजोर बनाउँछ । चलचित्रको काम राम्रोसँग नसकिँदै इगोले काम राम्रोसँग नसकिए पनि एकै दिन ल्याउने चक्करले चलचित्र थप बिग्रिने सम्भावना उच्च हुन्छ ।
त्यसैले चलचित्र राम्रो बनाउनेतर्फ लाग्नु र स्वस्थ प्रतिस्पर्धा गर्नु नै अहिलेको उत्तम विकल्प हो । अस्वस्थ प्रतिस्पर्धा गरिरहने र इगो साध्न केन्द्रित हुने हो भने चलचित्रको गुणस्तर र व्यापार दुवै थप ओरालो लाग्दै जाने निश्चित छ ।